البداية مع المخرجة  المغربية الشابة أسماء المدير، وعلى هامش الفوز ديالها بالنجمة الذهبية في الدورة العشرين للمهرجان الدولي للفيلم بمراكش عن فيلمها "كذب أبيض"، وبعد 20 عام ولأول مرة المغرب كياخد جائزة بمثل هاد الثقل أسماء بطبيعة الحال هدات الإنجاز ديالها لصاحب الجلالة الملك محمد السادس نصره الله  وعبرات أسماء عن خالص امتنانها لجلالة الملك "أب المغاربة كاملين"،  وقالت أنه خلق أكاديمية كرة القدم أو وصلوا وليداتو لنصف نهائي كأس العالم، وخلق لينا أيضا ورشات أكاديمية الأطلس بمؤسسة المهرجان الدولي للفيلم بمراكش،  وها حنا اليوم، وليدات هاد الورشة نزأر في مراكش وكنفوزو بنجمتنا الأولى،أو نهديها لك  يا جلالة الملك من الجدير بالذكر أن أسماء سبق ليها وربحات جوائز دولية عن فيلمها "كذب أبيض" فحال جائزة الإخراج ففئة "نظرة ما" فمهرجان "كان"، كما أن الفيلم نفسو مرشح  للمنافسة على جائزة أوسكار أفضل فيلم عالمي أو من مراكش للعاصمة الإسماعيلية مكناس، بحيث تم‘إحياء فعاليات الدورة 7 من ملتقى مكناس للكتابة المسرحية، بمشاركة ثلة من الكتاب والمخرجين المغاربة كتهدف هاد التظاهرة المسرحية اللي كينظمها "مسرح الشامات" بشراكة مع وزارة الشباب والثقافة والتواصل والمعهد الفرنسي بمكناس وجماعة مكناس، إلى اكتشاف الأعمال المسرحية المعاصرة خاصة مسرح المؤلف أما برنامج هاد الدورة، غيكونو فيه ورشات تكوينية في المسرح، وقراءات مسرحية بمشاركة كتاب ومخرجين مغاربة، فحال يوسف فاضل ،فهد الكغاط، لزبير بن بوشتى وعبد الحق الزروالي أو نختمو فقرة نجوم ويك بلاطفورم ميزيكال سبوتيفاي، واللي كشفات عن لائحة أكثر الفنانين استماعا 2023، جات فيها تايلور سويفت، آد باني، دا ويكاند، فصدارة قائمة طوب 10   تايلور حطمات الأرقام القياسية فسبوتيفاي  بأكثر من 26.1 مليار ستريم عالمي لألبومها Midnights، أما آد باني فوصل لأول مرة ل61.1 مليون ستريم لألبومو Un Verano Sin Ti  Hébergé par Ausha. Visitez ausha.co/fr/politique-de-confidentialite pour plus d'informations.

بزاف من السيدات القصيرات، فينما كيبغيو يشريو حوايج جداد، كيعانيو أنهم يلقاو الملابس اللي تواتي الشكل والطول ديالهوم، وكتزاد حدة هاد المشكل خاصة فالبرد لأن أكثرية الملابس كتكون أوفر سايز الشيء اللي كيخليك تزيدي تباني قصيرة لهاد الغرض، غنقترح عليك عزيزتي القصيورة 5 إطلالات شتوية موضة 2024 غيعاونوك تباني أطول   أولا الجمسبوت  Jumpsuit  فالغالب  ما كتخالط الأزياء المعروفة بجمبسوت Jumpsuit،يرومبر Romper، وبلاي سوت Playsuit، لكن عموما  الجمبسوت هو نوع  من الحوايج اللي كيكون فيها السروال لاصق بالبلوزة أو البودي الفوقاني ، أما البلاي سوت فكيكون مكون من قطعة واحدة لكن بسروال قصير هاد الستيل ديال الحوايج علاش كيلائم القصيرة، حيث بكل بساطة أي حاجة كتكون هابطة كوب طويلة ومافيهاش تقسيمات فالعرض كتمنحك طول أكثر ثانيا فستان عالي الخصر من بين الحوايج اللي مخصش ينقسوك فالماريو ديالك خاصة إلا كنتي كتحضري لسهرات كثيرة ، ومن الأفضل أنه يكون سامبل وجاي بحزام من نفس اللون فالخصر كيفما  فالفستان الساتان البرتقالي من  ماركة ألكسيس مابيل Alexis Mabille، هذه القطعة كتميز أيضا بكول الـ V Neck واللي كيساعد في إطالة الرقبة وتنحيف الصدر، نسقيه مع صندال نيود بلون الجلد ثالثا التنورات القصيرة حاولي تبعدي ما أمكن على الصايات الطوال حيت غيزيدو يبينوك قصيرة، فالمقابل لبسي ميني جيب من الجلد معا طوب فنفس اللون، كيفما جا فإطلالة عارضة أزياء ماركة فندي Fendi، نسقي اللبسة مع بوت من نفس اللون رابعا الملابس المخططة  مين كتلبسي حوايج مخططة بشكل عمودي، فأنتي كطبقي حيلة من أبرز حيل الموضة المتبعة لإطالة القامة، ما تتردديش في اعتماد هذه الطبعة في كامل اللوك ديالك، كيفما لبسات عارضة ماركة تودز Tod's، واللي ظهرات ببدلة سوداء مخططة بالأبيض بحزام من نفس اللون والموتيف خامسا موضة المونوكروم موضة المونوكروم هي فاش كتلبسي جميع القطع فلون واحد،  وهى من الخدع البسيطة اللي كيتنصح بتطبيقها للظهور بقامة أطول خاصة إذا كانت بلون ترابي قريب للون الجلد  Hébergé par Ausha. Visitez ausha.co/fr/politique-de-confidentialite pour plus d'informations.

فالكثير من الأحيان، كتجي للسيدات مهمة تنظيف المنزل صعبة شوية، وكيعجزو عليها خصوصا إذا كانت الدار مرونة بزااف، غافلين أنه كاينين بزاف ديال العادات السيئة اللي كيديروها  ما كتزيد إلا تصعب عليهم عملية التنظيف، أو باش يساليوها دغيا كيبقاو ساعات طوال أو ما كيلحقوش يكملوها  لهاد السبب غنتكلم ليكوم  اليوم على مجموعة من العادات السيئة إلا تجنبتيهوم سيدتي غتجمعي دارك أو تنقيها بأقل مجهود وبأقل وقت  أولا تراكم الأوراق والكتب كثرة الأوراق والكتوبة اللي كتبقا مليوحة فكل بلاصة، كتزيد من الروينة وسط الدار، داكشي علاش من الأحسن أنكي تخصصي شي قنت فالدار خاص بالفواتير والأوراق الإدارية والشخصية، و ركن آخر مخصص للكتوبة  أما إلا كانو عندك وليدات صغار، فمن الأفضل تولفيهوم عادة  أنهم يحطو كتوباتهوم المدرسية فخزانة خاصة لهاد الغرض ثانيا ترك الأواني المتسخة في الحوض من بين أسوأ الحوايج اللي كتخلي الدار تبان مرونة ومسخة، لأن بكل بساطة إلا خليتي لافابو عامر بالماعن ليلة كاملة، من جهة الجراثيم كتكثر أو حتى ريحة الكوزينة كتولي خانزة، أو من جهة أخرى مين كتبغي ديري الميناج كتجيك القضية صعيبة أو كتعجزي عليها  ثالثا ارتداء الأحذية الخارجية داخل المنزل  من أكثر العادات الخايبة اللي كتزيد توسخ المنزل ديالك هي دخل بسباط الزنقة وسط الدار، لذلك يفضل أنكوم تخليو سبابطكوم اللي كتخرجو بيهو لبرا حدا الباب أو تلبسو صنادل ديال الدار نقيين، هاكا غتكونو منعتو الغبرة أو التراب يدخلو ليكوم للدار أو فنفس الوقت غاتباقا الدنيا مجموعة حيت ماغايبقاوش الصبابط معرمين وسط الدار وباش تربا فيكوم هاد العادة، بإمكانكوم أنكم تشريو ماريو منظم للصبابط حطوه حدا باب الدار أو حطو حداه كرسي صغير باش اللي بغا يبدل صباطو ما يعجزش عليه Hébergé par Ausha. Visitez ausha.co/fr/politique-de-confidentialite pour plus d'informations.

كاين مجموعة من الأطفال اللي كيتزادو بتشوهات خلقية فالجسد ديالهوم إما بعوامل وراثية أولا نتيجة لمشاكل صحية أثناء الحمل ، كتخليهوم أنهم يكونو عرضة لمجموعة من الأمراض الجانبية اللي كتكون بعض المرات خطيرة جدا ، المتلازمة اللي غنتكلمو عليها اليوم هي متلازمة كروزون، فما هي هاد المتلازمة، شناهي أسبابها وطرق العلاج منها؟ مفهوم متلازمة كروزون Crouzon Syndrome كتعرف أيضا باسم خلل التنسج القحفي الوجهي، هي اضطراب وراثي كيتميز بالتحام طبقات الجمجمة في وقت مبكر قبل ما يتزاد البيبي، هاد الالتصاق المبكر وغير الطبيعي كيؤدي لتشوهات على مستوى شكل الوجه والرأس بعد الولادة  أما فالحالة العادية، فالمفاصل الليفية لعظام الجمجمة  كتجمع مور اكتمال نمو الرأس، لكن فحالة الإصابة بهذا الاضطراب كتجمع هاد الغرز قبل الموعد ديالها، الشيء اللي كيعطينا فاللخر تشوه فالرأس والوجه أسباب متلازمة كروزون العوامل الرئيسية هي وراثية وما عندهاش علاقة كبيرة بالظروف ديال الحمل، فالوليدات الصغار يمكن ليهوم يتزادو بيها واخا عاشو فكرش ماماهوم فحالة صحية مزيانة، وهادشي راجع لوجود طفرة في أحد جينات FGFR الأربعة، وبالضبط جين FGFR2 أعراض متلازمة كروزون غالبا ما كتبان أعراض متلازمة كروزون ففترة ما بعد الولادة، وكتمثل فرأس قصير وعريض أو طويل وضيق،جبهة كبيرة، عينين واسعين ومنتفخين، عينين حولين،نيف صغير وعريض، ضعف تطور الفك العلوي اللي كيخلي الطفل يلقى صعوبة فالأكل، أسنان مزاحمة ومداخلة فبعضياتها ونقص فالسمع طرق العلاج من متلازمة كروزون كيتطلب العلاج من هاد  المتلازمة فريق من الأطباء المتخصصين فبزاف ديال المجالات الطبية، فحال طب الأطفال، وجراحة الفم والوجه والفك والتجميل والأعصاب، بالإضافة لطب الأنف والأذن والحنجرة وطب العيون وكيبقى الحل النهائي لهاد الحالة الصعيبة هو أن الوليدات يخضعو لعملية جراحية غتعاونهوم يحسنو نمو النص ديال وجهوم باش هاكا يحميو راسهوم من العمى والإعاقة الذهنية المرتبطة بضعف نمو الدماغ بالطبع هاد العملية كتجي بعد استشارة الطبيب واطلاعو على الحالة الصحية  ديال الطفل اللي فالغالب كتختلف من طفل لآخر Hébergé par Ausha. Visitez ausha.co/fr/politique-de-confidentialite pour plus d'informations.

نبداو بشركة واتساب، واللي علنات أنها غادي ترجع ميزة عرض الصور والفيديوهات لمرة واحدة على واتساب ويب بعدما وقفاتها لأكثر من عام لأسباب أمنية  وللاستفادة من هاد الميزة من الضرورري أنكم تكونو دايرين آخر آبدايت للتطبيق، بحيث غتمكنكوم هاد الخاصية من فتح الصور والفيديوهات اللي مسيفطين مرة واحدة فواتساب باستعمال الحاسوب من الجدير بالذكر أن هاد الخاصية ماكتسمحش بحفظ الميديا المشتركة فواتساب، بحيث مايمكنليكش تبارطاجيها أولا تسكرينيها أو كتختفي تلقائيا بعد 14 يوم فحالتما ما دخلتيش شفتيها  أو نتاقلوا لمنصة يوتيوب المتخصصة فنشر مقاطع الفيديو ، واللي بدات كتنهج سياسة صارمة فالتعامل مع حجب الإعلانات آد بلوكر، بحيث أكدات الشركة المالكة غوغل أن الآدس على يوتيوب هي الداعم الرئيسي اللي كيساعد صناع المحتوى على الاستمرار في إنتاج محتوى متجدد وبالتالي بإمكان يوتيوب أنه  يحرم المستخدم من مشاهدة الفيديوهات ، في حالة كان مآكتيفي خدمات حجب الإعلانات Ad Blocker ووضحات غوغل أن الخيار بيد المستعملين، إما يحيدوا آد بلوك  أولا يتآبوناو فخدمة يوتيوب بريميوم المدفوعة مقابل اشتراك شهري، باش يتفرجو فالمحتوى  بلا إشهارات  أو نختمو فقرة "تيك ويك" بمنصة إكس تويتر سابقا، واللي كشف تقرير جديد لـنيويورك تايمز أن الشركة مهددة  بخسارة 75 مليون دولار ، بعد عام واحد فقط من استحواذ إيلون ماسك عليها ووفقا لنفس التقرير ،فهاد الخسائر فقطاع الإعلانات جات نتيجة انسحاب أكثر من 200 معلن فحال أمازون وأبل وإيرنبي وارتفعات نسب وتيرة انسحاب المعلنين فالشهر الأخير،  خصوصا فاش نشر إيلون ماسك تعليق معاد للسامية، بحيث قال إن المجتمعات اليهودية تدعم كراهية البيض Hébergé par Ausha. Visitez ausha.co/fr/politique-de-confidentialite pour plus d'informations.

بداية مع الرابور المغربي الكراندي طوطو، واللي فقط على مرور أيام قليلة من خروج تراك "ولاد العدول" ، واللي حقق نسب مشاهدات عالية في مختلف ليبلاطفورم ميزيكال، يوتيوب سبوتيفاي وديزير، انتشرت موجة كبيرة من الضحك والسخرية فالسوشل ميديا على واحد سطر من مورسو ديالو كيقول فيها "لاصيليخيطي دي بيني خوطا" طوطو، أو فكونسير ليه هاد الويكاند فكازا ، شرح فتصريح صحافي أن داك السطر ليدار البوز فالسوشل ميديا ماغيفهموهش غير ولاد دربو ، بحيث EGT  كتعني الكراندي طوطو أو BNG كتعني بن جدية الحومة اللي تزاد وكبر فيها مين كان صغير، وأكد أنهم دي زينيسيال ديالو فوسط دربهوم وكشف طه فحصي أنه تمكن من تحقيق الحلم ديالو من خلال إصدار ألبوم 27  واللي كيجمع تراكات متنوعة كتوشي معاناة الشاب المغربي  أو نتاقلوا للمغني المغربي حاتم عمور، واللي وضح أنه تلقى العديد من العروض المغرية باش يحيي حفلات وسهرات فنية في الجزائر، إلا أنه رفض بشكل قطعي  وقال عمور في تصريح ليه ” ماغاندير حتى شي حفل بالجزائر، مهما كان العرض مغري " مؤكدا أن سبب الرفض ديالو راجع لدولة الجزائر، لأنها تضع الحصار على المغاربة، "واللي داير لينا الحصار نعملو عليه حنا اللولا الحصار" أونختموا فقرة "نجوم ويك" بالمهرجان الدولي للفيلم بمراكش، واللي تم الاحتفاء بيه فدورتو العشرين، وذلك بحضور ألمع نجوم السينما المغربية والعالمية وشكل هذا الحفل مناسبة للاحتفاء بالمسار المتميز  اللي راكمو المهرجان الدولي للفيلم بمراكش،  منذ الإطلاق ديالو من طرف صاحب الجلالة الملك محمد السادس نصره الله، ثم ترؤس صاحب السمو الملكي الأمير مولاي رشيد، ليكرس نفسه مع مرور السنوات كمحطة دولية للفن السابع العالمي Hébergé par Ausha. Visitez ausha.co/fr/politique-de-confidentialite pour plus d'informations.

كاين اللي فينما كيدخلوه شي فلوس كيجلس يفكر فين يخسرهوم أو آش يدير بيهوم، وكاين اللي مكيفكرش كيمشي نيشان يخسرهوم فالخاويات، فإذا كنتي من هاد الفئة اللي مكتعرفش فلوسها فين كتمشي، أجي معايا نعطيك 4 ديال التطبيقات اللي غادي تعاونك تنظم تعاملاتك المادية باش هاكدا تعرف كل درهم فين مشا أولا تطبيق كابيتال Qapital كيساعدك هاد التطبيق فأنك تجمع مبالغ صغيرة من الفلوس بلا ما تعذب،بحيث كيخلي للمستخدمين ديالو هما يتحكمو  فخاصية وضع قواعد الادخار اللي باغين هما، من خلال قاعدة كتسمى guilty pleasure، متعة المذنب، واللي كيخلي ليك فيها التطبيق واحد المبلغ صغير بزاف فحالتما بغيتي تخرج على الميزانية إذا تشهيتي تشري شي حاجة نفسك فيها التطبيق كيمنح فترة مجانية مدتها 30 يوم، موراها خاصك تخلس رسوم الاشتراك كتوصل ل 3 دولار شهريا  ثاني تطبيق You Need a Budget كيفصل ليك هاد التطبيق الميزانية {يالك بشكل أدق وبطريقة سهلة، من خلال التركيز على ثلاثة ديال القواعد، اعطي أهمية لكل دولار،خبي فلوسك لدواير الزمان عيش بنفس مستوى الشهر اللي فات وكيهدف هاد التطبيق بشكل أساسي لتغيير الطريقة اللي كتسير بها فلوسك، وكيخليك تخبي مواردك المالية بدون معاناة، الشيء اللي كيخليك حاط أهداف  مالية قدامك أو قاد تحققهوم ثالثا تطبيق مانت Mint كينظم  ليك هاد التطبيق كاع  الحسابات المالية ديالك وكيراقبها، وكيتبع جميع الأنشطة المالية ديالك من جميع الحسابات بما في ذلك الفواتير والديون والراتب التقاعدي، كل هادشي في بلاصة واحدة  إنتويت كويك بوكس Intuit Quick Books هاد التطبيق ممتاز اللي عندهوم بروجيات صغار ، فإذا كنتي كتجيغي شي ستارت آب فهاد التطبيق غيمكنك من إدارة كافة مصاريف وأموال الشركة، بالإضافة إلى أموالك ومصاريفك الشخصية الخاصة بلاما يتخلطو ليك بجوج Hébergé par Ausha. Visitez ausha.co/fr/politique-de-confidentialite pour plus d'informations.

إذا كنتي عوال تحضر لمناسبة رسمية أو عملية، أو كتقلب على حطة ناضية لتبينك أنيق وكلاس، دور الأزياء العالمية كتخرج كل سنة كولوكسيون من أرقى الكوستيمات الرجالية، إوا إلا كنتي حاير آش غادي تلبس أجي معايا نوريك آخر ما جادت به براندات البدل الرجالية، اللي كتجمع بين الأناقة أو فنفس الوقت  فراند بادجيت كوستيم من دار الأزياء الإيطالية بريوني  Brioni الماركة المفضلة عند براد بيت وتوم كروز وكريستيان بيل ومايكل فاسبندر على السجادة الحمراء، فإذا كنتي على استعداد تام باش تحط فلوسك للاستثمار فكوستيم هارب، فماركة بريوني غتكون خيارك الأمثل ولإطلالة كاجوول، ماركة بريوني كتقدم ليكوم تصميم جذاب لأنوسومبل مصمم من بليزر طويل وواسع وبجياب أماميين على الخصر، مع جوج د الصدايف للإغلاق، أما السروال فكيجي بتصميم واسع، وتقدر تنسقو مع شوميز أبيض، وصباط الجلد أسود لامع كوستيم من  برونيلو كوتشينيلي Brunello Cucinelli  برونيلو كوتشينيلي حتا هي من السميات الثقال ديال الخياطة الإيطالية العريقة، كتقدم مجموعة متنوعة من البدل الرجالية بجميع الأحجام وجميع المناسبات، فإذا كنتي كتقلب على إطلالة راقية وأنيقة، يمكنك ليك تستاعن بتصميم مميز من كوستيم برونيلو الأزرق ، كيجي ببليزر طويل فيه  3 جيوب أمامية ، مع كول عريض وجوج صدايف باللقهوي، أما السروال فكيجي بتصميم كلاسيكي واسع كوستيم من هاكيت لندن  Hackett London إلا كنتي من عشاق الستيل البريطاني، هاكيت لندن هي الماركة التجارية المناسبة ليك، بحيث كتقدم ليك  كوستيمات كلاسيكية وفعالة ومناسبة لجميع الأذواق ، سواء كانت ثلاثة ديال  القطع أنيقة أولا أونسومبل كري منقوش بموتيف سافاج كوستيم من توم فورد Tom Ford إذا كنتي من مواكبين صيحات الموضة فما يمكنليكش تفلت شي موديل من هاد الماركة العالمية، ، اعتمد لووك شتوي باللون الأسود من دار توم فورد لأناقة شبابية عصرية وكلاس ، الكوستيم بطبيعة الحال عندو أصولو وقواعدو والأماكن والمناسبات اللي كيليق ليه،لكن المهم فهادشي كامل هو أن الكوستيم خاصو يكونو ذو جودة عالية أو أنيق فنفس الوقت  Hébergé par Ausha. Visitez ausha.co/fr/politique-de-confidentialite pour plus d'informations.

كاين مجموعة من الأشخاص اللي ميقدروش يبداو النهار ديالهوم بلاما يشربو على الأقل كاس ديال القهوة، حيت عارفين أن هاد المشروب السحري هو الحل الأمثل  لمقاومة تعب نهار طوبل ومتعب، بحيث كعطيهوم الطاقة اللازمة باش يقدرو يفكرو ويكملو الخدمة ديالهوم بكفاءة وفعالية  لكن الحاجة اللي كيغفلو عليها بزاف ديال الناس، هي أن شرب القهوة بكثرة  لدرجة الإدمان، عندو تأثيرات جانبية  على الصحة ديالنا ، إذ من الممكن أنها ترفع ليك مستوى ضغط الدم، أو تزيد من معدل ضربات القلب ديالك لهادشي غنقتارح عليكوم أربع طرق بديلة يمكن ليكوم تعوضو بيها شرب القهوة،  واللي غتعاونكوم فاسترجاع الطاقة و الحيوية ديالكوم أولا مشروب الشاي كيتعتابر من بين أفضل بدائل القهوة، لأنه حتا هو مشروب ساخن وكيحتوي على نسبة خفيفة من الكافيين مقارنة بالقهوة، داكشي علاش ما غاديش تأثر صحتك بنفس التأثير السلبي اللي كيديرو الكافيين الموجود فالقهوة زيد عليها أن الشاي الأخضر كيحتوي على نسبة مضادات الأكسدة كثيرة، كتزيد من مناعة الجسم وكتحميك من بعض الأمراض المزمنة ثانيا الشوكولاتة السوداء معروفة الشوكولاتة الداكنة باحتواءها على نسبة من الكافيين و الثيوبرومين اللي كيساعد على زيادة مستويات الطاقة و تحسين وظائف الجهاز الهضمي ووظائف المخ وكيحفز اليقظة العقلية وتحسين المزاج ثالثا وجبة إفطار متوازنة كلما كان الفطور ديالك متوازن غدائيا كلما بديتي النهار ديالك بنشاط وحيوية، لذلك من الأفضل تبعد على مصادر السكريات لأنها مضللة، كتبان أنها كتعطيك الطاقة وهي فالحقيقة دغيا كتهضم أو كيتقاضا تأثيرها بمجرد نفاد الطاقة فالمقابل، كثرو من البروتينات أو الدهون الصحية فحال البيض المسلوق، والمكسرات، والفواكه لا،ها بإمكانها تعطي جسمكم المزيد من الطاقة رابعا شاي الماتشا  يحتوي شاي الماتشا على نسبة عالية من مضادات الأكسدة واللي بدورها مسؤولة على زيادة الطاقة، كما أنه كيحتوي على "الإثينين"، وهو حمض أميني كيريح العقل بلا ما يجيب النعاس والخمول، كما أنه فحالة تم الخلط ديالو مع الكافيين، فهو كيعمل على توفير الطاقة  طول النهار كما أنه  كيحسن من المزاج Hébergé par Ausha. Visitez ausha.co/fr/politique-de-confidentialite pour plus d'informations.

تصدر المغرب حسب تصنيف جديد لموقع "إنسايدر مانكي" قائمة أحسن الدول الإفريقية من حيث التقدم التكنولوجي، بحيث جا في المرتبة اللولا بناءا على بيانات منظمة الويبو العالمية للملكية الفكرية  هاد التصنيف المشرف لبلادنا المغرب جا بالإعتماد على مجموعة من المعايير الدولية من بين أبرزها عدد المقالات العلمية المنشورة، بالإضافة لاستخدام التكنولوجيا والاتصالات والاستثمار الاقتصادي فهاد المجال من بين الأشياء الأخرى اللي خلات المغرب يجي في المرتبة الأولى فهاد التصنيف حسب موقع "إنسايدر مونكي" الأمريكي، هي أن المغرب كان من البلدان الإفريقية الأولى اللي استعملات شبكة الجيل الثالث من الاتصالات الرقمية "تروا جي"، بحيث حصلات الرباط على 208  ديال النقاط خلاتها تتربع على عرش الدول التكنولوجية في القارة السمراء أو نتاقلو لشركة آبل العالمية، واللي كتخطط بدءا من العام المقبل  إطلاق ميزة  كتسمح بتبادل الميساجات الفورية بشكل سلسل بين أجهزة آيفون وأندرويد عبر الإنترنت آبل علنات في بيان ليها أنها غادي دعم معيار التراسل الفوري المتطور "إر-سي-إيس" ، مما غيسهل عملية التراسل بين اللي كيستعملو هواتف آيفون وأندرويد، بلا ما يحتاجو بالضرورة لتطبيقات أخرى معيار "إر-سي-إيس"  كيتعتبر من بين آخر معايير مؤسسة"جي-إيس-إيم" للتراسل،  بحيث بإمكانكوم إرسال واستقبال الرسائل النصية عبر الإنترنت ،بالإضافة لتبادل الصور والفيديوهات والملفات  الثقيلة هاد النظام الجديد، غيخدم جنبا لخدمة "آي مسج" اللي  كتسمح لمستخدمي آبل بمراسلة بعضهم البعض بلون أزرق في المحادثات، بينما كتبان الرسائل بلون أخضر فحالة وجود مستخدم أندرويد  أو نختمو فقرة "تيك ويك" بشركة واتساب، واللي طلقات ميزة جديدة يقدرو من خلالها المستخدمين يربطوا حساباتهوم بالمايل الإلكتروني الخاص بيهوم الميزة الجديدة متاحة للمستخدمين اللي دايرين آخر آبدايت للتطبيق في هواتف آيفون ، ومن المقرر إطلاقها أيضا لمستخدمي أندرويد في الأيام المقبلة وتتيح هاد الميزة إمكانية استقبال كود ديال فاليداسيون اللي كيتكون من 6  ديال الأرقام عن طريق المايل في حالة ماتمش وصولو  فميساج عادي "إيس-إيم-إيس" Hébergé par Ausha. Visitez ausha.co/fr/politique-de-confidentialite pour plus d'informations.